Заява ў сувязі з прыняццем Палатай прадстаўнікоў Нацыянальнага сходу законапраекта аб рэпрадуктыўных тэхналогіях

У апошнія часы ва ўсім свеце многа ўвагі надаецца праблеме кланавання чалавечых эмбрыёнаў з мэтай «вытворчасці» чалавечых асобаў ці так званым рэпрадуктыўным тэхналогіям. Не адстае ў гэтым і Беларусь. Палата прадстаўнікоў Нацыянальнага сходу 27 красавіка 2011 г. у першым чытанні прыняла законапраект аб дапаможных рэпрадуктыўных тэхналогіях і гарантыях правоў грамадзян пры іх ужыванні.

Каталіцкі Касцёл, раздзяляючы занепакоенасць праблемай бясплоднасці і заахвочваючы да пошуку новых метадаў яе лячэння, у той жа час катэгарычна выступае супраць выкарыстання тэхналогій, якія супярэчаць хрысціянскаму паняццю годнасці сям’і, бацькоўства, дзетанараджэння і чалавечага эмбрыёна, а таксама значэння чалавечай сексуальнасці.

Тэндэнцыя аддзялення паняцця жыцця ад паняцця сям’і як натуральнага асяроддзя, дзе зараджаецца і развіваецца жыццё, з’яўляецца адным з найбольш згубных наступстваў культуры смерці. Чалавечае жыццё ўзнікае ў выніку рэалізуемага падчас акту сужэнскай любові ўзаемнага аддавання мужчыны і жанчыны. Сужэнцы пры гэтым не з’яўляюцца гаспадарамі, а толькі слугамі ў справе любові Стварыцеля. Таму зачаты чалавек — гэта плод любові бацькоў і ён не можа быць прадметам жаданняў або прадуктам зачацця ў выніку медыцынскага ці біялагічнага ўмяшання.

Таму кланаванне чалавечых арганізмаў і выкарыстанне рэпрадуктыўных тэхналогій нясе ў сабе сур’ёзныя cупярэчнасці маральнага і антрапалагічнага характару, а таксама вядзе да дэвальвацыі каштоўнасці як чалавечага жыцця і прадаўжэння чалавечага роду, так і сям’і — асноўнай клеткі кожнага грамадства, і яе фундаментальнага значэння для ўсяго чалавецтва.

Сур’ёзную заклапочанасць выклікае і той факт, што законапраект рыхтаваўся без кансультацый з рэлігійнымі арганізацыямі, асабліва з Каталіцкім Касцёлам і Праваслаўнай Царквой, якія маюць вельмі многа напрацовак у гэтай галіне і пазіцыі якіх вельмі блізкія, а таксама без адпаведнага грамадскага абмеркавання.

У сувязі з гэтым, заклікаю дзяржаўныя ўлады, усе маральна здаровыя сілы грамадства, навукоўцаў, рэлігійныя арганізацыі звярнуць увагу на гэтую праблему, каб не дапусціць парушэння галоўнага права чалавека на жыццё — самага вялікага Божага дару, і абразы яго годнасці.

Перафразоўваючы словы вельмі паважанага ў Беларусі папы Яна Паўла II, які 1 мая 2011 г. быў далучаны да ліку благаслаўлёных, жадаю сваёй Бацькаўшчыне: Беларусь, калі хочаш быць ВЯЛІКАЙ, захоўвай жыццё ад самога зачацця праз акт сужэнскай любові аж да натуральнай смерці.

З малітвай і благаслаўленнем

Арцыбіскуп Тадэвуш Кандрусевіч

Мітрапаліт Мінска-Магілёўскі

Мінск, 3 мая 2011 г.

арц. Тадэвуш Кандрусевіч, Мітр. Мінска-Магілёўскі

Рубрыка: 

 

 

Яшчэ па тэме Заганнае зачацце? Рэпрадуктыўныя тэхналогіі, кантрацэпцыя, аборты: