Зварот да парафіянаў касцёла Св. Сымона і Св. Алены ў сувязі з падзеямі 19.XII. 2011 г.

Шаноўныя парафіяне!

З нагоды падзей, якія адбыліся каля нашага касцёла 19.12.2011г., лічу патрэбным папярэдзіць вас і прыгадаць, якое мае заданне Храм Божы ў жыцці кожнага хрысціяніна.

Напачатку прапаную вам вытрымкі з Канону Касцельнага Права, якім кіруюцца ўсе Каталіцкія Касцёлы свету, у тым ліку і наш – Святога Сымона і Святой Алены ў Мінску:

Канон 1214:

Слова касцёл азначае святы будынак, прызначаны для Божага культу (аўт. набажэнстваў), у які вернікі маюць права ўваходу з мэтай выканання ў ім культу (аўт. напр., Святая Імша, Святая Споведзь, Шлюб, Хрышчэнне, Абрад пахавання, Еўхарыстычныя працэсіі, Ружанцовыя малітвы, Адарацыі і духоўна-рэлігійная музыка і спевы на праслаўленне Усявышняга, Маці Божай і Святых…).

А Канон 1220 Касцельнага Права, параграф №1 гаворыць наступнае:

Усе вернікі маюць абавязак клапаціцца і не дапускаць да таго, каб у храме адбывалася (аўт. рабілася) тое, што абражае святасць гэтага месца.

Як мы бачым і пераконваемся, што Касцельнае Кананічнае Права не дапускае ў Храме ніякіх другіх дзеянняў, акрамя праслаўлення Госпада, выкання Святых Сакрамантаў і асвячэння сваёй душы.

А вось, што нам гаворыць дакумент – Кампендый сацыяльнага вучэння Усяленскага Касцёла ў раздзеле IV параграф 50:

Касцёл не атаясамліваецца з палітычнай супольнасцю і не звязаны ні з адной палітычнай сістэмай, паколькі палітычная сістэма і Касцёл дзейнічаюць кожны ў сваёй сферы. Яны незалежныя і аўтаномныя, «хоць і з розных матываў служаць асабістаму і грамадскаму пакліканню адных і тых жа людзей».

Паважаныя! Мы жывём сярод розных людзей. Сучасны свет – гэта свет сэкулярызаваны, у якім могуць знаходзіцца розныя людзі, якія не маюць аніякага дачынення да веры, Бога і Касцёла, але якія хацелі б выкарыстаць нас, парафіянаў, у сваіх мэтах.

Гасподзь Ісус Хрыстос настаўляе:

“Дом Мой з’яўляецца Домам малітвы” (Лк 19, 46), і пра гэта ніколі нельга забываць.

Як мы дагэтуль ішлі з вераю Божай дарогаю да Храма, так і далей будзем ісці ў наш касцёл, які з’яўляецца Божым Домам малітвы.

Дарагія парафіяне! Я прашу вас не паддавацца заклікам людзей з па-за касцёла і не дапускаць пры нашым Храме ніякіх сходаў, якія не звязаныя са Святой Імшою ці з малітваю.

Чалавек ідзе ў Храм. Навошта ты ідзеш туды?

Ідзем, каб спаткацца з Богам, каб праз малітву паразмаўляць з Богам і атрымаць Божае блаславенства. Калі ж нехта захоча звесці з гэтай Божай дарогі, то заклікаю вас, дарагія парафіяне, не слухайце такіх людзей і не сыходзьце з гэтай дарогі, бо Гасподзь, да Якога вы кіруеце свае крокі, чакае вас.

“Дык аддайце кесарава кесару, а Божае Богу” (Мф 22, 21).

г. Мінск

27.XII.2011г.

Westki.info