|
Беларускі
інфармацыйны рэсурс аб Царкве і Хрысьціянстве.
Гэта самае кароткае, але і самае дакладнае апісаньне гэтага сайту. Што адлюстравана і ў даменным імені churchby.info:
CHURCH
- Царква;
BY
- Беларусь;
INFO
- Інфармацыя.
Мы ставім на мэту даць як мага больш дакладнай і, галоўнае, аб'ектыўнай інфармацыі аб Хрысьціянскай Царкве у розных яе вымярэньнях - нябесным і зямным, дагматычным і практычным, усяленскім і нацыянальным. Гэта сайт пра хрысьціянскую веру, але менавіта з таго пункта гледжаньня, што гэтая вера немагчымая без Царквы, а таму мы павінны шукаць, сьцьвярджаць і ўмацоўваць сваю веру ў Царкве, якая ёсьць Целам Хрыстовым.
Але мы ведаем, што бывае вельмі цяжка прыняць Царкву такой, якая яна ёсьць. Магчыма, гэта такое выпрабаваньне. І тут ёсьць дзьве супрацьлеглыя спакусы - адвярнуцца ад Царквы ці заплюшчыць вочы на рэальнасьць. Таму, каб гэтага пазьбегнуць, будзем прымаць Царкву зь яе праблемамі, не хаваючы іх, прымушаючы сябе шукаць іх вырашэньне - праз роздум, праз веру, праз сьвятасьць, праз Бога.
Наш сайт беларускі. Гэта значыць, што ён будзе канцэнтраваць сваю ўвагу на падзеях і праблемах царкоўнага жыцьця ў Беларусі, тым больш, што мясцовай інфармацыі такога кшталту ня так шмат. Але Царква - гэта, як вядома, зьява ўсяленская, а таму гэта будзе погляд ня толькі ў Беларусь, але і погляд зь Беларусі.
І яшчэ істотная заўвага. Сайт робіцца праваслаўнымі
хрысьціянамі, якія паводле кананічнага стану знаходзяцца у Беларускай Праваслаўнай Царкве. Як праваслаўныя, мы бачым Царкву ў Праваслаўі,
а таму перш за ўсё нашу ўвагу будзе прыцягваць менавіта гэтая галіна хрысьціянства.
Але нам блізкія і ўсе тыя, хто
носіць імя Хрыстовае, хаця б таму, што яго носяць і захоўваюць частку гістарычнай спадчыны і досьведу хрысьціянства. Таму ў полі нашага зроку і
іншыя, неправаслаўныя хрысьціяне,
аб якіх таксама будзем старацца даваць аб'ектыўную і даставерную
інфармацыю.
Каб уся нашая інфармацыя была сапраўды дакладнай і аб'ектыўнай запрашаем усіх, каго хвалюе жыцьцё ў Царкве, да супрацоўніцтва.
|
